«Кайгырту» приютында тәрбияләнүчеләр табигать сагында
Россия урман көне кысаларында ТР Алексеевск муниципаль районының «Кайгырту» балалар һәм яшүсмерләр өчен социаль приютында «Урманнар – планетабызның байлыгы» дигән экологик чаралар үткәргәннәр.
Мәктәпкәчә һәм кече яшьтәге мәктәп балалары В. Сухомлинскийның «Сандугач алдында оят» дигән хикәясен тыңладылар, «Ярый / ярамый» уенын уйнадылар, сорауларга җавап бирделәр: урман нигә кирәк? Кешеләр урманнарга нинди зыян китерә? Урманда үзеңне ничек тотарга? Дәреснең гамәли өлешендә балалар урман җәнлекләрен буядылар.
Ә урта һәм өлкән мәктәп яшендәге балаларга «Урман – безнең байлыгыбыз» видеоролигын күрсәттеләр. Балалар урманның кислород чыганагы икәнен белделәр. Приютта тәрбияләнүчеләр түгәрәк өстәл оештырдылар һәм кече Ватанның экологик проблемалары турында фикер алыштылар, урманда үз-үзеңне тоту кагыйдәләрен кабатладылар, дару үләннәре турында белемнәре белән уртаклаштылар.