Балаларның уңышлары – «Кояшлы» үзәге белгечләренең шатлануына сәбәп

2025 елның 14 феврале, җомга

14 февральдә Казанның «Кояшлы» мөмкинлекләре чикләнгән балалар һәм яшүсмерләр өчен тернәкләндерү үзәгендә адаптив физик культура буенча дәрес узды. Аны инструктор Юлия Лебедева үткәрде.

Үзәк белгечләре һәр балага игътибар һәм кайгыртучанлык белән карыйлар, ышаныч һәм шатлык атмосферасы тудыралар. Дәресләрнең уен формасы тәрбияләнүчеләрдә мөһим күнекмәләрне – дөрес йөрүне, тигезлекне саклап калуны, хәрәкәтләрне координацияләүне үстерүгә ярдәм итә. Дәресләрдә төрле спорт инвентарьлары, велотренажерлар һәм виброплатформалар кулланыла, шуңа күрә һәр очрашу мавыктыргыч вакыйгага әверелә. Балалар яңа хәрәкәтләрне үзләштереп, «уңыш сукмагын» бик теләп үтәләр, ә аларның һәрбер казанышы үзәк белгечләре командасы өчен чын бәйрәмгә әверелә.