Эш бирүчеләр өчен «Абилимпикс» – эшкә урнаштыру өчен кандидатлар табу мөмкинлеге
Татарстанда 5-30 май көннәрендә инвалидлар һәм мөмкинлекләре чикле кешеләр арасында һөнәри осталык буенча «Абилимпикс» региональ чемпионаты узачак. Анда 1 233 конкурсант катнашачак, бу узган ел белән чагыштырганда 400 кешегә күбрәк. Бу хакта ТР Һөнәри компетенцияләрне үстерү үзәге генераль директоры Эмиль Гобәйдуллин «Татар-информ»да узган матбугат конференциясендә хәбәр итте.
«Ярышларда 414 укучы, 425 студент һәм 394 белгеч катнашачак. Быел «Мәктәп укучылары» категориясендә катнашучылар саны шактый артты. Бу «Абилимпикс»ның һөнәри юнәлеш бирү һәм эшчәнлеккә мотивация арттыру буенча нәтиҗәле корал булуын күрсәтә. Узган ел анда 800дән артык конкурсант, 154 белем бирү оешмасы катнашты», – дип сөйләде спикер.
Бәйсез экспертлар сыйфатында республиканың 20дән артык предприятиесе һәм оешмасы вәкилләре чыгыш ясаячак. Ярышлар 33 мәйданчыкта 91 компетенция буенча узачак, шул исәптән 29 колледж һәм техникум, югары уку йортлары һәм «Кванториум» технопаркында. Ярышлар Казанда, Яр Чаллыда, Түбән Камада, Арчада, Лениногорскида, Бөгелмәдә, Нурлатта, Әлмәттә, Болгарда, Лаешта оештырыла.
Быел беренче тапкыр ярышлар Минзәлә сәламәтлек мөмкинлекләре чикләнгән ятим балалар һәм ата-ана тәрбиясеннән мәхрүм калган балалар өчен интернат-мәктәп мәйданчыгында узачак.
Чемпионат исемлегенә өстәмә рәвештә Татарстанның хезмәт базарында иң кирәкле 42 төбәк компетенциясе кертелде. Моннан тыш, ярышлар 49 милли компетенция буенча узачак, аларның нәтиҗәләре буенча республика җыелма командасы төзеләчәк. Ул Татарстанны 20-23 октябрьдә Мәскәүдә узачак милли чемпионат финалында тәкъдим итәчәк.
«Сетевая компания» генераль директорының персонал буенча урынбасары Всеволод Семенюк «Абилимпикс» чемпионаты эш бирүчеләр өчен эшкә урнаштыру өчен кандидатлар табу мөмкинлеге дип өстәде.