Министрлык вәкилләре Казанның Мәскәү районы халыкны эш белән тәэмин итү үзәге эшчәнлеген тикшерделәр

3 нче марттан алып 11 нче мартка кадәр ТР Хезмәт, халыкны эш белән тәэмин итү һәм социаль яклау министрлыгы тарафыннан "Мәскәү районы халыкны эш белән тәэмин итү үзәге" дәүләт казна учреждениесе эшчәнлегенә комплекслы тикшерү уздырылды. Тикшерү РФ субъектларының дәүләт хакимияте органнары вәкаләтләре нигезендә мәшгульлек өлкәсенә караган дәүләт гарантияләрен тәэмин итү-итмәвен белү максатларыннан үткәрелә. Шулай ук мәшгульлек органнарының инвалидларны эшсез сыйфатында теркәве, хезмәт законнарын һәм хезмәт хокукы нормалары булган башка төр норматив-хокукый актларны үтәве тикшерелә.
Әлеге тикшерү килгәндә  исә, ул  мәшгульлек үзәге эшчәнлегенең 1991 елның 19 апреленнән №1032-1 "Россия Федерациясендә халыкның мәшгульлеге хакында" законына һәм РФ субъектлары  дәүләт хакимияте органнарының вәкаләтләрен тормышка ашыру буенча башка норматив-хокукый актларга (гражданнарга туры килерлек эш, ә эш бирүчеләргә кирәкле хезмәткәрләр табуга ярдәм итүгә юнәлдерелгән) тәңгәл рәвештә башкарылу-башкарылмавын белү максатларыннан чыгып үткәрелгән.

Тикшерү барышында түбәндәге кимчелекләр ачыкланган:

- гражданнарны эшсез дип тану хакында карар кабул итү яки аларны эшсез дип танымау өлкәсендә;

- мәшгульлек өлкәсендә дәүләт хезмәтләрен алучылар регистрындагы мәгълүматның чынлыктагы фактлар белән тәңгәл килмәвендә;

- халыкны эш белән тәэмин итү үзәгенә озак вакыт килми тору аркасында (соңгы тапкыр килгәннән соң 1 ай дәвамында күренмәү) учеттан төшерү турында карар кабул итү өлкәсендә.

Шулай ук дәүләт хезмәтләре федераль стандартлары таләпләрен бозу, регламентларда каралган административ хәрәкәтләрнең тәртибе бозылу, шулай ук 1996 нчы елның 21 нче декабреннән булган "Ятим балалар һәм ата-аналар каравыннан мәхрүм калган балаларга социаль ярдәм буенча өстәмә гарантияләр турында" 159 нчы Федераль закон таләпләрен бозу очраклары күзәтелгән.

Тикшерү нәтиҗәләре буенча куелган тәртиптә тикшерү актлары төзелеп, кимчелекләрне  бетерү турында приказ әзерләнәчәк.