Югары Ослан өлкәннәр һәм инвалидлар өчен интернат-йортка Казаннан волонтерлар килгән

Шушы көннәрдә Югары Осланның өлкәннәр һәм инвалидлар өчен интернат-йортында Казаннан волонтерлар булып киткән. Балалар үзләренең ял көннәрендә әби-бабайларга бәйрәм оештырырга булганнар: акварель белән рәсем ясау буенча мастер-класс уздырганнар һәм концерт куйганнар. Интернатта яшәүчеләрнең күңеленә шәхси бүләк җыелмалары хуш килгән: анда сөлгеләр, мунча кирәк-яраклары, башка көндәлек кирәк-яраклары булган.
Волонтерлар шулай ук интернатта яшәүчеләрнең тормышы уңайлы булу турында да кайгыртып, кино карау өчен йорт кинотеатры бүләк иткәннәр.
Шуны да әйтергә кирәк,  бу балалар волонтерлар оешмасы түгел, өлкәннәргә ярдәм итәргә теләк белдергән бер төркем дуслар булып чыккан. Алар үзләренең финанс мөмкинлекләрен һәм оештыру сәләтләрен берләштереп, менә шулай яхшылык эшләргә ният  кылганнар.