Министрлык «Кешеләр өчен дәүләт» федераль проектына кушылды
Татарстан Республикасы Хезмәт, халыкны эш белән тәэмин итү һәм социаль яклау министрлыгы «Халыкны эш белән тәэмин итү үзәге аша эшкә урнаштыру» дигән тормыш ситуациясенә клиент үзәкле алым кертте. Сервис «Кешеләр өчен дәүләт» федераль проекты кысаларында гамәлгә ашырылды.
Хәзер республика халкы өчен эш эзләү персональләштерелгән, уңайлырак һәм нәтиҗәлерәк процесска әверелде. Үзәкләрнең белгечләре гражданнарны эшсезләр сыйфатында теркәп кенә калмыйча, белемнәрен, тәҗрибәләрен, карьера өметләрен һәм тормыш шартларын исәпкә алып, эш эзләүнең индивидуаль траекторияләрен дә төзиләр. Резюме төзү, әңгәмәләргә әзерләнү һәм кирәкле һөнәри күнекмәләрне үстерү буенча шәхси консультацияләр практикасы кертелде. Эшсез гражданнар үз эшләрен ачуга финанс ярдәме алырга мөмкин.
Хезмәтләрне цифрлаштыру яңартылган системаның мөһим элементы булды. «Россия эше» порталында һәм шул ук исемдәге мобиль кушымтада дистанцион рәвештә эш эзләүче сыйфатында теркәлергә һәм туры килгән вакансияләр турында хәбәрнамәләр алырга, эшсезлек буенча пособие рәсмиләштерергә, һөнәри белем алуга гариза бирергә мөмкин. Авыр тормыш хәлләрендә калган гражданнарга аерым игътибар бирелә. Инвалидлар, эш тәҗрибәсе булмаган яшьләр һәм пенсия яшенә җиткән гражданнар өчен стажировкалар, субсидияле эшкә урнашу, махсуслаштырылган эш урыннары булдыруны үз эченә алган махсус ярдәм программалары эшләнгән.
Республикада мәшгульлек өлкәсендә хезмәт күрсәтүләрдән файдалану мөмкинлеген арттыру өчен «Россия эше» кадрлар үзәгенең бердәм контакт-үзәге эшли башлады. Сервис эшкә урнашу, һөнәри белем алу һәм махсус ярдәм программаларында катнашу мәсьәләләре буенча 8 (843) 222-05-57 бердәм номеры буенча оператив консультация алырга мөмкинлек бирә. Контакт-үзәк мәшгульлек хезмәтенең барлык территориаль бүлекчәләрен берләштерә, бу республиканың теләсә кайсы районыннан гражданнарга өйләреннән чыкмыйча гына квалификацияле ярдәм алырга мөмкинлек бирә.