«Тылсымлы гипс» инклюзив остаханәсендә якты иҗат утлары

2025 елның 9 декабре, сишәмбе

Зәй районының «Шатлык» халыкка социаль хезмәт күрсәтү комплекслы үзәге тарафыннан гамәлгә ашырыла торган «Тылсымлы гипс» инклюзив остаханәсе» проекты кысаларында «Пятерочка» кибете базасында гипс шәмдәлләрен ясау буенча мастер-класс узды.

Бу инде циклның икенче дәресе. Узган мастер-класста катнашучылар гипс кою нигезләре белән таныштылар.

Мастер-класс кабат иҗатның чикләре булмавын исбатлады. Уртак өстәл артында үзара ярдәмләшү һәм илһам атмосферасы хөкем сөрде.

«Пятерочка» кибетендә мастер-класслар уздыруның аерым мәгънәсе бар. Бу инвалид һәм җәмгыять арасындагы киртәләрне бетерә, иҗтимагый киңлекне иҗади очрашулар һәм инклюзив аралашу урынына әйләндерә.