Югары Ослан интернат-йортында яшәүчеләр прокуратура вәкилләре белән очрашты
Киләсе инвалидлар ункөнлеге кысаларында прокурор Эдуард Садреев һәм прокурорның өлкән ярдәмчесе Юлия Тихонова Югары Ослан өлкәннәр һәм инвалидлар интернат-йортында булдылар.
Учреждение директоры Тәнзилә Васильева озатуында кунаклар социаль хезмәт алучыларның бүлмәләрендә булдылар, яшәү шартларын карадылар. Алар шулай ук кышкы бакчада, ашханәдә, мунча-саунада, спелеокамерада, сенсор бүлмәсендә, тернәкләндерү бүлегендә, ДФК кабинетында, медицина кабинетында, компьютер классында булдылар. Шуннан соң учреждениенең актлар залында интернат-йортта яшәүчеләр белән ышанычлы сөйләшү булды.
Очрашу барышында социаль хезмәт алучылар үзләренең шәхси проблемалары белән уртаклаштылар, барлык борчыган сорауларга прокурордан җаваплар алдылар.
Эдуард Садреев интернат-йортта яшәү шартларының яхшы булуын билгеләп үтте, барысына да нык сәламәтлек теләде.
Интернат-йорт директоры Тәнзилә Васильева әйтүенчә, район прокуратурасы белән уртак эш социаль хезмәт күрсәтүнең сыйфатын яхшыртырга, өлкәннәрнең иминлеген тәэмин итәргә ярдәм итә.