«Яңарыш» үзәге – «Иң мөһиме турында» конкурсында җиңүче

2025 елның 17 ноябре, дүшәмбе

Бөгелмә районының «Яңарыш» мөмкинлекләре чикләнгән балалар һәм яшүсмерләр өчен тернәкләндерү үзәге коллективы «Иң мөһиме турында» II республика конкурсында «Сугышчан сафта җыр» номинациясендә җиңү яулады.

Конкурста катнашучылар үзләренең вокаль сәләтләрен генә күрсәтмәделәр, Ольга Дубованың «Честь имею» җырына видеоклип тәкъдим итеп, ватанпәрвәрлекнең мөһимлеген дә ассызыкладылар.

Үзәк хезмәткәрләре балаларга ватанпәрвәрлек хисен актив тәрбиялиләр, чын патриотик рухның ачык үрнәге булып торалар. Алар шәхси үрнәк – үсеп килүче буында мөһим кыйммәтләрне тәрбияләү һәм формалаштыруның иң яхшы ысулы, дип ышаналар.