«Өмет чаткысы» үзәгендә яңа комплекс белән эшне уңышлы керттеләр
Арча районының «Өмет чаткысы» мөмкинлекләре чикләнгән балалар һәм яшүсмерләр өчен тернәкләндерү үзәгендә «Белемгә юл» проектын гамәлгә ашыру төгәлләнеп килә. Проект гражданлык җәмгыятен үстерүгә Татарстан Республикасы рәисе грантларын бирү конкурсында җиңүче булган иде. Грант акчаларына «Колибри. Лого» программа-аппарат комплексы сатып алынды. Аның ярдәмендә үзәк белгечләре төрле сөйләм тайпылышлары булган балалар белән коррекцион-үстерү эшен үткәрделәр.
27 октябрьдә тернәкләндерү үзәгендә педагоглар өчен семинар оештырылды. Семинар кунаклары «Колибри. Лого» комплексы һәм аны куллануның уңай нәтиҗәләре белән танышты. Катнашучылар комплексның кайбер уеннарын уйнадылар һәм төзәтү-үстерү дәресләрендә интерактив системаларны куллану белгечләргә мөмкинлекләре чикләнгән балаларның психик процессларын, танып белү эшчәнлеген һәм сөйләм активлыгын интеграцияләргә мөмкинлек бирә, дип билгеләделәр.