Югары Ослан интернат-йортында МХО сугышчылары өчен чираттагы ярдәм партиясе әзерләнде
Югары Ослан районы башлыгы Евгений Варакин һәм ТР Премьер-министры ярдәмчесе генерал-лейтенант Владимир Майстренко Югары Ослан өлкәннәр һәм инвалидлар интернат-йортында булдылар.
Кунаклар учреждение буйлап йөреп чыктылар, ашханә, кышкы бакча, медицина кабинеты, тоз бүлмәсе, тернәкләндерү бүлеген карадылар, тәрбияләнүчеләр белән очраштылар, алар белән аралаштылар, күрсәтелә торган хезмәтләрнең сыйфатыннан канәгатьме-юкмы икәнлеге белән кызыксындылар. Алар чисталыкны һәм хезмәткәрләр тырышлыгы белән тудырылган чын өй ямен билгеләп үттеләр. Биредә яшәүчеләр персоналга игътибарлары һәм кайгыртулары өчен рәхмәт белдерделәр.
Район башлыгы һәм генерал-лейтенант шулай ук МХО сугышчыларына күрсәткән ярдәмнәре өчен учреждениегә рәхмәт белдерделәр. Хезмәткәрләр һәм яшәүчеләр азык-төлек җыялар, ятьмәләр үрәләр, җылы оекбашлар бәйлиләр, мендәрләр тегәләр, үләннәр белән хуш исле чәй әзерлиләр. Чираттагы партия шушы көннәрдә Куралово авылындагы гуманитар ярдәм кабул итү пунктына тапшырылачак.