«Кояшлы» тернәкләндерү үзәгендә тәрбияләнүчеләр юл хәрәкәте кагыйдәләрен өйрәнәләр

2025 елның 29 сентябре, дүшәмбе

Бөтенроссия юл хәрәкәте куркынычсызлыгы атналыгы кысаларында Казандагы «Кояшлы» мөмкинлекләре чикләнгән балалар һәм яшүсмерләр өчен тернәкләндерү үзәгендә Росмолодежь гранты ярдәмендә оештырылган чара узды. Әлеге вакыйганың максаты балаларның юлда үз-үзләрен тоту кагыйдәләре турында хәбәрдар булуларын арттыру һәм аларда куркынычсызлык мәсьәләләренә җаваплы мөнәсәбәт формалаштыру булды.

Чара барышында балаларга юл хәрәкәтенең төп кагыйдәләре җентекләп сөйләнде. Оештыручылар үзләренең һәм әйләнә-тирәдәгеләрнең иминлеген тәэмин итү өчен әлеге нормаларны үтәүнең әһәмиятенә басым ясадылар.