Гражданнарның аерым категорияләре торак-коммуналь хезмәтләр өчен түләүгә субсидия-ташламалар ала ала
Татарстан Республикасында торак һәм коммуналь хезмәтләр өчен түләү буенча халыкка социаль ярдәм чаралары комплексы каралган. Төп урынны Россия Федерациясе һәм Татарстан Республикасы норматив хокукый актлары нигезендә бирелә торган субсидияләр-ташламалар алып тора.
Субсидия-ташламаларның күләме гражданнарның һәр категориясе өчен законнарда билгеләнгән һәм торак-коммуналь хезмәт күрсәтүләр хакының аларны куллану нормативлары чикләрендә исәпләнгән 30 % тан 100 % ка кадәр тәшкил итә.
2025 елның июленә субсидия-ташламалар алучылар булып 282 345 федераль һәм 405 813 төбәк ташламаларыннан файдаланучы санала.
Моннан тыш, РФ Торак кодексы нигезендә торак-коммуналь хезмәтләр өчен түләү күләме ТКХ бәясенең төбәк стандартлары чикләрендә гаиләнең гомуми кеременең 21 % тан артыграк булган гражданнарга торак урыны һәм коммуналь хезмәтләр өчен түләүгә субсидия бирелә.
Субсидияләргә хокуклы Россия Федерациясе гражданнары:
- дәүләт һәм муниципаль торак фондларының торак урыннарыннан файдаланучылар;
- хосусый торак фондының торак урыннарын наем шартнамәләре буенча яллаучылар;
- торак кооперативлары әгъзалары;
- торак биналарның милекчеләре.
Шулай ук республикада өстәмә рәвештә 6 төр субсидия кертелгән.
2025 елда субсидияләрне 48 293 гаилә алды.
Күрсәтелгән социаль ярдәм чараларын күрсәтү субсидияләр алучыларның керемендә торак-коммуналь хезмәтләр өчен үз түләүләре күләмен җылыту чорында 12 % һәм җылыту булмаган чорда 7 % дәрәҗәсендә саклап калырга мөмкинлек бирә.
Шунысын да билгеләп үтәргә кирәк, әлеге социаль ярдәм чаралары гражданнарга күрсәтелгән хезмәтләр өчен түләү буенча соңгы өч ел эчендә барлыкка килгән бурычлары булганда күрсәтелми.
Татарстан Республикасы законнарында билгеләнгән субсидияләр-ташламалар аларны алучыларның салым бурычы булмаганда бирелә.
Санап үтелгән барлык социаль ярдәм чаралары алучыларның даими яшәү урыны буенча Республика матди ярдәм (компенсация түләүләре) үзәге бүлекчәләре тарафыннан күрсәтелә.
Социаль ярдәм чараларын билгеләү турында гаризаларны шәхсән Республика матди ярдәм (компенсация түләүләре) үзәге бүлегендә яисә Татарстан Республикасы дәүләт һәм муниципаль хезмәтләр порталы аша бирергә мөмкин.