«Ялкын» социаль приютында яңа теплицалар барлыкка килде

2025 елның 14 июле, дүшәмбе

«Теплица хуҗалыгы» программасы кысаларында «Татнефть» ГАҖ волонтерлары Бөгелмә районындагы балалар һәм яшүсмерләр өчен «Ялкын» социаль приюты өчен теплицалар сатып алганнар.

Теплицада эшләү тәрбияләнүчеләрне бик тиз мавыктырды. Балалар рәхәтләнеп эшкә тотындылар һәм үз эшләрен үсемлекләр өчен грунт әзерләүдән башладылар. Балалар энтузиазм белән помидор һәм борыч үсентеләре утырттылар. Хәзер алар үсемлекләрне карарга булышуда актив эшлиләр.

Хезмәт терапиясе психик, эмоциональ һәм физик сәламәтлекне торгызырга, хезмәт күнекмәләрен үстерергә ярдәм итә, шулай ук табигатькә сакчыл карарга өйрәтә.