Түбән Камада «Шәфкать» үзәге белгечләре үзенчәлекле балаларга потенциалларын ачарга булыша
Түбән Кама районының «Шәфкать» халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлекчәсе хезмәткәрләре көн саен үзенчәлекле балалар тәрбияләүче гаиләләр белән заманча белем бирү технологияләрен һәм махсус җиһазларны кулланып, интенсив эш алып бара. Иң яхшы нәтиҗәләргә ирешү өчен белгечләр балаларның материалны яхшырак кабул итүенә ярдәм итә торган интеграцияле дәресләр кертәләр.
Эшчәнлекнең төрле төрләре бер сәгать дәвамында алмашыну аркасында мондый дәресләр баланың артык аруын булдырмаска ярдәм итә. Һәр балигъ булмаган бала, үзенең индивидуаль үсеш дәрәҗәсенә йөз тотып, берьюлы өч махсуслаштырылган дәрестә катнаша. Бу баланың игътибарын, мотивациясен үстерергә ярдәм итә, чөнки ул дәреснең һәр этабының озакка сузылмавын һәм дәреснең икенче өлешенә күчәр алдыннан биремнәрне тиз үтәүне таләп итүен алдан белә.
Дәресләрнең педагогик блогы балаларның когнитив сәләтләрен үстерүгә, аларның белемнәрен киңәйтүгә һәм игътибарлылык дәрәҗәсен арттыруга юнәлдерелгән. Савыктыру блогы «Сәламәтлек баскычы» программасы ярдәмендә баланың физик әзерлеген яхшыртуга, эре моториканы үстерүгә юнәлтелгән.
Төрле материаллар белән эшләү күнекмәләрен үстерүгә аерым игътибар бирелә. Бу күнекмәләр «Иҗат дөньясы» махсус программасы кысаларында формалаша.
Белгечләрнең иң мөһим бурычы – балага үзен уңышлы итеп тоярга мөмкинлек бирә торган шартлар тудыру. Дәресләрнең төрле формаларын интеграцияләү баланың үзләштергән белем һәм күнекмәләр спектрын шактый киңәйтергә мөмкинлек бирә, кыенлыкларны җиңеп чыгу сәләтен формалаштырырга ярдәм итә.
Чаралар «Инвалид балалар тәрбияләүче гаиләләргә ярдәм» региональ чаралар комплексын гамәлгә ашыру кысаларында, Авыр тормыш хәлендә калган балаларга ярдәм фонды гранты акчасына сатып алынган җиһазларны кулланып үткәрелә.