«Асылташ» приютында тәрбияләнүчеләр балалар спартакиадасында катнаштылар
Яр Чаллы шәһәренең «Асылташ» балалар һәм яшүсмерләр өчен социаль приютында тәрбияләнүчеләр Мәскәүнең «Клязьма» сәламәтләндерү комплексы территориясендә узган XI «Үзеңдә кеше тәрбиялә» балалар спартакиадасында катнаштылар.
Масштаблы спорт чарасына 24 команда җыелды. Чараны РФ Спорт министрлыгы, Россия Олимпия комитеты, Мәскәү өлкәсе Администрациясе, Мәскәү өлкәсе Спорт министрлыгы ярдәмендә «Детский дом» хәйрия фонды оештырды.
Ярышларның программасы бай һәм күптөрле иде. Ярышларда катнашучылар йөгерү, йөзү, сикерү, өстәл теннисы, шашка, турникта тартылу, мини-футбол һәм пионербол буенча көч сынаштылар.
«Асылташ» командасының казанышлары аеруча игътибарга лаек. Балалар бик яхшы нәтиҗәләр күрсәттеләр, йөзү буенча ярышларда беренче һәм пионербол буенча турнирда мактаулы өченче урын яуладылар.