«Опека» үзәгендә ачык ишекләр көне уздырдылар

2025 елның 12 феврале, чәршәмбе

11 февральдә Әлмәт районының «Опека» халыкка социаль хезмәт күрсәтү комплекслы үзәге базасында социаль-көнкүреш җайлашу кабинетының ачык ишекләр көне узды. Чара Авыр тормыш хәлендә калган балаларга ярдәм фондының «Инвалид балалар тәрбияләүче гаиләләргә ярдәм» региональ чаралар комплексын гамәлгә ашыру кысаларында оештырылды.

Чарага мөмкинлекләре чикләнгән балаларны һәм аларның ата-аналарын чакырдылар. «Опека» үзәге белгечләре һәм психологлары мавыктыргыч уеннар һәм тренинглар уздырды, алар катнашучыларга ял итәргә һәм аралашудан ләззәт алырга ярдәм итте.

Чара кысаларында шулай ук коймак һәм салат әзерләделәр, суган, укроп һәм чәчәкләр утырттылар. Барлык кунаклар да активлыкларда рәхәтләнеп катнаштылар.