«Яңарыш» үзәгендә тематик дәрес үткәрделәр

2025 елның 27 гыйнвары, дүшәмбе

27 гыйнвар көнне Бөгелмәнең «Яңарыш» мөмкинлекләре чикләнгән балалар һәм яшүсмерләр өчен тернәкләндерү үзәгендә балалар китапханәсе белән берлектә оештырылган тематик дәрес узды. Ул Ленинград блокадасын бетерү көненә багышланган.

Чара барышында үзәктә тәрбияләнүчеләр презентация белән таныштылар, анда камалышта калган шәһәрдә яшәүчеләрнең тормыш фактлары тәкъдим ителде. Балалар блокададагы Ленинградның авыр көннәре, анда яшәүчеләрнең батырлыгы һәм ныклыгы турында белделәр.

Мондый чаралар илебезнең тарихи мирасына ихтирамлы мөнәсәбәт формалаштыруга ярдәм итә, патриотлык һәм коточкыч сынаулар кичергән буыннарның батырлыклары өчен горурлык хисләре тәрбияли.