Шундый көчле һәм яратучан әниләр
Түбән Камадан Татьяна Леонтьева – тормышы гаҗәеп рухи көч, фидакарьлек һәм гаиләгә тугрылык үрнәге булган хатын-кыз. Өч бала анасы, ул тормыш сынауларын намус белән җиңеп чыга, тирә-юньдәгеләрне үзенең ныклыгы һәм оптимизмы белән рухландыра. Аның тарихы – мәхәббәт, югалтулар, көрәш һәм шартларны җиңү тарихы.
2009 елда ирен югалткан Татьяна Леонтьева балаларын ялгызы тәрбияли. Олы улы Казанда карьера кора, кызы мәктәп укучысы, төрле чараларда һәм проектларда катнаша. Улы Станиславның тумыштан ук ДЦП диагнозы.
Станислав туганнан соң беренче еллар хатын-кыз өчен өзлексез борчылу һәм улының сәламәтлеге өчен көрәш вакыты була. Бертуктаусыз медицина тикшеренүләре, тернәкләндерү процедуралары, ДЦП белән авыручы балаларның үсеш үзенчәлекләрен даими өйрәнү – болар барысы да гаять зур физик һәм эмоциональ көч таләп итә. Хатын-кыз күп кенә шәхси планнарыннан һәм теләкләреннән баш тарта, үзен тулысынча улына багышлый.
Татьяна Леонтьева улын карап кына калмаган. Ул авыруның барлык аспектларын өйрәнә, даими рәвештә тернәкләндерүнең яңа методларын эзли, белгечләр белән киңәшләшә, алдынгы дөнья тәҗрибәсен өйрәнә. Тулысынча савыгу мөмкин түгеллеген аңлап, ул игътибарын Станиславның тормыш сыйфатын максималь яхшыртуга юнәлтә.
Станислав махсуслаштырылган «Өмет» мәктәбендә укый, төрле конкурсларда актив катнаша, адаптив спорт белән шөгыльләнә.
Татьяна Леонтьева искиткеч әни генә түгел, уңышлы педагог та. 26 ел гимназиядә чуаш теле һәм әдәбияты укытучысы булып эшли.
2024 елның сентябрендә Татьяна Леонтьева следж-хоккей уены программасы буенча уңышлы уку уза, бу аңа мөмкинлекләре чикләнгән балаларны укытырга гына түгел, ә бу спорт төрен киң таратырга да мөмкинлек бирә. Ул спорт чараларын һәм ярышлар оештыруда актив катнаша, балаларны яңа үрләргә ирешергә рухландыра.