Гаилә ярдәме – бәяләп бетергесез
Хоккейда чын ир-атлар уйнаса да, аларның иң көчлеләренә һәм кыюларына да кайвакыт хатын-кыз ярдәме, җылылык һәм яхшы сүз кирәк.
Балтач районыннан Алинә һәм Михаил Медниковларның тату гаиләсе актив тормыш рәвеше алып бара, мәдәни, спорт, мәгариф чараларында катнаша, волонтерлык эшчәнлеге белән шөгыльләнә. Медниковлар кызлары Валерияне һәм сәламәтлеге буенча мөмкинлекләре чикләнгән уллары Ярославны тәрбиялиләр.
Валерия – 7 сыйныф укучысы, «Кызлар-скаутлар ассоциациясе» балалар төбәкара иҗтимагый оешмасы әгъзасы. Ул «Беренчеләр хәрәкәте» гомумроссия иҗтимагый-дәүләт балалар һәм яшьләр хәрәкәтендә тора, инвалид балалар өчен оештырылган мастер-классларда, уен программаларында катнаша.
Ярослав – Бөгелмә һөнәри-педагогика көллияте студенты. Сәламәтлеген саклау өчен ул даими рәвештә «Возрождение» мөмкинлекләре чикләнгән балалар һәм яшүсмерләр өчен тернәкләндерү үзәгендә дәвалану курслары уза. Егет «Искра» адаптив хоккей командасының капитаны булып тора. Команда 2022 елда Татарстан Республикасының Адаптив спортны үстерү үзәге һәм «Татнефть» хәйрия фонды ярдәмендә формалаштырылган.
Ата-аналар балаларына һәрьяклап ярдәм итәләр. Ярослав хоккей белән кызыксыну белән, әнисе һәрвакыт улы һәм команда янында барлык матчларда һәм турнирларда бергә була.
«Башта җиңел булмады, әмма, барлык авырлыкларга карамастан, без булдырдык. Әлегә кадәр җиңү шатлыгын да, уңышсызлык ачысын да бергә кичерәбез. Мин үзенчәлекле балаларның да җәмгыятьтә үз урыннарын табуын, һөнәр табуларын, спортта уңышларга ирешү, кызыксыну буенча дуслар табу мөмкинлеге булуын бик телим», – ди Алинә Медникова.