«Шатлык» социаль хезмәт күрсәтү үзәгендә Гаилә белән аралашу көнен билгеләп үттеләр
12 сентябрьдә Зәй районы «Шатлык» халыкка социаль хезмәт күрсәтү комплекслы үзәгенең көндезге тору бүлегендә Россиядә Гаилә елы кысаларында Гаилә белән аралашу көненә багышланган викторина узды.
Бу көнне гаилә элемтәләрен ныгытуга, гаиләләрнең иминлеген арттыруга һәм уртак мавыгуларга кызыксынуны үстерүгә юнәлдерелгән төрле чаралар үткәрелә. Шундый чараларның берсе – викторина, ул катнашучыларга гаилә традицияләре, кыйммәтләре һәм тарихы турындагы белемнәрен тикшерергә ярдәм итә.
Чара барышында катнашучылар командаларга бүлештеләр. Һәр команда гаилә мөнәсәбәтләре, тарихы, гореф-гадәтләре белән бәйле сорауларга җавап бирде. Викторина берничә этапта узды.
Мондый чаралар – үз тамырларың турында яңа нәрсәләр белү һәм гаилә бәйләнешләрен ныгыту өчен менә дигән ысул.
