Азнакай интернат-йортыннан ике пар күн туйларын билгеләп үттеләр

2024 елның 23 мае, пәнҗешәмбе

22 майда Азнакай өлкәннәр һәм инвалидлар өчен интернат-йортында ике гаилә пары никахлашуларының өч еллыгын – күн туйларын билгеләп үттеләр. Интернат-йорт белгечләре Черниковлар һәм Скорняковлар өчен бәйрәм өстәле әзерләделәр, бүләкләр тапшырдылар.

Олег һәм Наталья Черниковлар интернат-йортта танышканнар. Танышуның өченче көнендә үк алар инде аерылырга теләмәүләрен аңлаганнар. Алар бер-берсендә таяныч кына түгел, ә, үзләре әйткәнчә, чын мәхәббәтне дә күрә алганнар. Парның уртак хоббисы да бар – алар декоратив-гамәли сәнгать белән шөгыльләнәләр.

Скорняковлар сүзләренчә, гаилә шундый катлаулы язмышлы өлкән яшьтәге кешеләргә һәм инвалидларга мәгънәле һәм уңай тәэсирләр белән тулы бөтенләй башка тормыш башларга ярдәм итә.