«Кайгырту» приютында тәрбияләнүчеләр өчен игелек дәресе

2024 елның 15 мае, чәршәмбе

Гаилә елына багышланган дәресләр кысаларында Алексеевск районының «Кайгырту» балалар һәм яшүсмерләр өчен социаль приютында «Әни күзләре» дигән игелек дәресе үткәрелде.

Дәрес әти-әниләрен бик яраткан, әмма алар турында төрлечә кайгырткан ике апа-кардәш турында кечкенә гыйбрәтле хикәя тыңлаудан башланды. Текстның эчтәлеге буенча тәрбиячеләрнең сорауларына җавап биреп, балалар төп геройларның гамәлләрен бәяләделәр.

Шулай ук балалар «Әни күзләре» уен чарасында катнаштылар. Алар актив һәм бердәм рәвештә төрле биремнәр үтәделәр, өйдә тәртип урнаштыру буенча үзләренең хезмәт күнекмәләрен кулланырга өйрәнделәр, шулай ук шигырьләр укыдылар һәм әниләренә рәхмәт сүзләрен белдерделәр.