Күпбалалы гаилә – зур хезмәт һәм олы бәхет
Татарстан Республикасының Балтач районында искиткеч Шакирҗановлар гаиләсе яши. Илнар белән Гөлназ 2010 елда өйләнешәләр. Бүген алар биш бала үстерәләр – кыз һәм дүрт ул. Назилә һәм Ильяс мәктәптә укыйлар, ә Сөләймән, Мөхәммәд һәм Ибраһим балалар бакчасына йөриләр.
Шакирҗановларның мәхәббәт һәм үзара аңлашу нигезендә төзегән гаилә учагы авылдашлары, туганнары һәм дуслары өчен үрнәк булып санала.
2022 елда Гөлназ Шакирҗанова Татарстан Республикасының «Ана даны – Материнская слава» медале белән бүләкләнгән. Бу югары дәрәҗәдәге ана билгесен, бердән дә ким булмаган балигъ булмаган бала булганда, биш һәм аннан да күбрәк бала тапкан һәм тәрбияләүче (тәрбияләгән) аналар ала.
Шакирҗановлар гаиләсе район чараларында һәм конкурсларында актив катнаша. Әйтик, быел Гөлназ «Авыл хатын-кызы» район конкурсында катнашты һәм «Тормыш шатлыгы» номинациясендә җиңде.
Гаилә башлыгы Илнар Шакирҗанов – үзмәшгуль. Ул умартачылык белән шөгыльләнә. Мөмкин булган эшкә балаларны да җәлеп итәләр.
Гаиләдә һәр бәйрәмне бергә билгеләп үтәләр. Хуҗабикә якыннарын бәйрәм өстәле һәм тәмле торт белән сөендерә.
«Күпбалалы гаилә – зур хезмәт һәм зур җаваплылык, ләкин зур бәхет тә», – ди күпбалалы әни. Бу гаиләдә һәрвакыт игелек һәм үзара аңлашу атмосферасы хөкем сөрә. Һәр баланың үз хуҗалык бурычлары бар. Балалар ата-ана назы һәм кайгыртуын тоеп үсә. Ата-аналар балаларына физик, рухи-әхлакый тәрбия бирүгә зур игътибар бирәләр, аларны өлкәннәргә хөрмәт белән карарга һәм Ватанны яратырга өйрәтәләр.