Ютазы балалары өчен кулинария иҗаты бәйрәме үткәрелде

2024 елның 7 мае, сишәмбе

Ютазы районының «Гармония» халыкка социаль хезмәт күрсәтү комплекслы үзәге белгечләре һәм авыл китапханәсе хезмәткәрләре Россиядә Гаилә елына багышланган «Балалар мәшгуль, ата-аналар тыныч» дигән чара уздырдылар. Анда күпбалалы һәм аз керемле гаиләләрдән балалар катнашты.

Оештыручылар «Гаилә һәм гармония» күргәзмәсен әзерләгән иде, анда рус һәм чит ил авторларының классик нәфис әдәбияты тәкъдим ителгән. Шулай ук катнашучылар белән гаилә кыйммәтләре, гаиләдә үзара ярдәм турында әңгәмә үткәрделәр.

Ике командага бүленеп, балалар конкурсларда катнаштылар, биремнәрне үтәделәр. Бу конкурслар балаларны оригиналь ризык әзерләү һәм күрсәтү эшендә берләштерде. Чара коллектив кулинария иҗатының чын бәйрәменә әверелде.