Татарстанда мәшгульлек өлкәсендә һөнәри осталык конкурсының төбәк этабы бара
III Бөтенроссия мәшгульлек өлкәсендә һөнәри осталык конкурсы башланды. Төбәк мәшгульлек хезмәтләре өч номинациядә ярышачак: «Мәшгульлек үзәгенең иң яхшы белгече», «Россиянең иң яхшы мәшгульлек үзәге», «Иң яхшы проект». Аларның һәрберсендә берничә категория бар. Гаилә елында, мәсәлән, «Иң яхшы проект» номинациясендә «Гаилә исеме өчен» категориясе булдырылды. Анда күпбалалы һәм ялгыз ата-аналарның, мәктәпкәчә яшьтәге балалары булган әниләрнең үз-үзләрен һөнәри яктан тормышка ашыруына ярдәм итүче мәшгульлек хезмәтләре инициативалары тәкъдим ителәчәк.
Тагын бер категория – «Кадрлар карарлары – сыйфат һәм тизлек» – персоналга ихтыяҗ зур булган предприятиеләрне кадрлар белән тәэмин итәргә тиеш.
Бөтенроссия мәшгульлек өлкәсендә һөнәри осталык конкурсы традицион рәвештә ике этапта уза. Төбәк этап 30 июльгә кадәр дәвам итәчәк. Иң яхшы белгечләр һәм иң якты проектлар 1 сентябрьдә башланачак федераль этапка чыгачак. Нәтиҗәләр 29 ноябрьгә кадәр ясалачак, ә бүләкләү тантанасы 2024 елның декабрендә узачак.