Яр Чаллыда яшүсмерләр үзләре белән килешеп яшәргә өйрәнәләр

Яр Чаллының «Ышаныч» халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлекчәсендә яшүсмерләр өчен «Үз-үзеңне танып белүгә сәяхәт» программасы буенча чираттагы дәрес узды. Психолог Фәйрүзә Вәлиева яшь катнашучыларга үзләрен аңларга, үзләре турында күзаллаулар формалаштырырга, нинди уңышлары белән горурлана алуларын билгеләргә ярдәм итте. Балалар үзләренең уңай сыйфатларын үстерү, үз-үзләренә уңай мөнәсәбәт формалаштыру һәм үз-үзеңне хөрмәт итү хисләрен үстерү ысуллары турында белделәр.

Психолог сүзләренчә, мондый дәресләр яшүсмерләрнең үзләрен кабул итүенә ярдәм итә, бу аларга комплекслардан арынырга, яшьтәшләре белән уңай мөнәсәбәтләр булдырырга ярдәм итә.