«Астра» үзәге тәрбияләнүчеләре милли орнаментлар белән таныша

2023 елның 21 марты, сишәмбе

20 мартта Алабуганың «Астра» мөмкинлекләре чикле балалар һәм яшүсмерләр өчен тернәкләндерү үзәгендә көндезге бүлек тәрбиячесе Наталья Белова иҗат остаханәсендә «Киемдә татар орнаменты» дәресен үткәрде. Чара Татарстан Республикасында Милли мәдәниятләр һәм гореф-гадәтләр елы кысаларында оештырылды.

Балалар һәм аларның әти-әниләре милли орнаментның үзенчәлекләре һәм төрләре белән таныштылар, чәчәк-үсемлек мотивларыннан композиция төзергә өйрәнделәр. Аппликация техникасында алар калфакта милли бизәкләр төшерделәр.

Чара балаларның татар халкының декоратив-гамәли иҗаты, гореф-гадәтләре һәм мәдәнияте турында белемнәрен киңәйтүгә ярдәм итте.