«Яңарыш» үзәгендә Май чабу бәйрәме чаралары

2023 елның 28 феврале, сишәмбе

Бөгелмәнең «Яңарыш» мөмкинлекләре чикле балалар һәм яшүсмерләр өчен тернәкләндерү үзәгендә Май чабу бәйрәме оештырылды. Чара Татарстан Республикасында Милли мәдәниятләр һәм гореф-гадәтләр елы кысаларында уздырылды.

Чара барышында балалар элек Май чабуны ничек бәйрәм иткәннәрен белделәр, әйлән-бәйлән уйнадылар, бәйгеләрдә катнаштылар. Алар шулай ук тәмле коймаклар белән сыйландылар.

Май чабуны бәйрәм итү, чараны оештыручылар фикеренчә, балаларны рус халкының мәдәнияте һәм гореф-гадәтләре белән таныштыру, ил тарихына мәхәббәт һәм хөрмәт тәрбияләү өчен яхшы ысул.