Уен бүлмәсе Азнакай интернат-йортында ачылды
Азнакай өлкәннәр һәм инвалидлар өчен интернат-йортта уен бүлмәсе ачылды. Ачылу тантанасында «Барс» спорт мәктәбе директоры Сәлимов Марсель һәм Актүбә бистәсенең 2нче урта гомуми белем бирү мәктәбе укучылары катнашты.
«Быел безнең интернат-йортыбыз «Татнефть» – «Игелек энергиясе» хәйрия фонды гранты җиңүчесе булды. Әлеге конкурска без «Такта уеннары – һәркем өчен уеннар» проектын тәкъдим иттек. Проектның максаты – өлкәннәрне һәм Инвалидларны тернәкләндерүнең актив формалары өчен шартлар тудыру, шулай ук сәламәт яшәү рәвешенә тотрыклы мотивация формалаштыру», – дип хәбәр иттеләр Азнакай интернат-йортында.
Грант акчасына уен бүлмәсе корнхолл, бочча, джакколо кебек заманча адаптив такта спорт уеннары белән җиһазландырылган. Моннан тыш, өлкәннәр һәм инвалидлар өчен өстәл теннисы да куелды.
Учреждение белгечләре билгеләп үткәнчә, интернат-йортта өстәл уеннары буенча күнекмә дәресләре эшләнгән һәм иң яхшы уенчыларны ачыклау өчен ярышлар планлаштырылган. Бу декабрьдә такта уеннары фестивален үткәрү планлаштырыла.