Алабугада яшәүче хатын-кыз социаль контракт ярдәмендә маникюр салоны ачты
Социаль контракт – граждан белән социаль яклау органы арасында гражданга авыр тормыш хәлен җиңүдә ярдәм итү максатларында төзелә торган килешү.
Алабуга шәһәрендә яшәүче Анастасия соцконтракт ярдәмендә яшьлек хыялын тормышка ашырган: «Мин аерылган, минем ике балигъ булмаган балам бар. Элек мин клининг компаниясендә персонал сайлау буенча менеджер булып эшли идем. Һәрвакыт үз эшемне ачарга һәм матурлык өлкәсендә эшләргә хыялландым».
Анастасия маникюр һәм педикюр остасы һөнәрен 2019 елда алган. Кыз рәсми эшкә урнашу белән вакансияне эзләде, әмма туры килә торган эш таба алмады. Эш бирүчеләр шәхси эшмәкәрлек ачарга һәм бина, җиһазлар арендаларга тәкъдим иткәннәр. Анастасия мондый юлның уңай һәм тискәре якларын бәяләде: салымнар һәм аренда чыгымнары теләгән табыш алырга мөмкинлек бирмәс иде. Өстәвенә, ул буш вакытын эшкә сарыф итә алмый, ялгыз ана игътибар таләп иткән балаларны тәрбияли иде.
Социаль контракт турында беренче тапкыр Анастасия массакүләм мәгълүмат чараларыннан белә. Татарстан Республикасы Алабуга муниципаль районындагы «Ышаныч» халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлекчәсе белгечләре хатын-кызга социаль контракт төзү нечкәлекләре турында сөйләде.
Бизнес-проектны уңышлы яклап, Анастасия 75 мең сумлык социаль контрактка кул куйган һәм салым инспекциясендә үзмәшгульлекне теркәгән, маникюр һәм педикюр остасы кабинетын ачкан. Социаль контракт кысаларында алынган акчаларны эшкуар һөнәри җиһазлар (педикюр, пылесос, лампа, инструментлар һәм чыгым материаллары) сатып алуга файдаланган. Һәр чыгымны Анастасия теркәп барган һәм социаль контракт шартлары нигезендә чыгымнар өчен хисап тоткан.
«Социаль контракт чараларын тормышка ашыруда миңа «Ышаныч» халыкка социаль хезмәт күрсәтү үзәгенең гаиләгә һәм балаларга социаль ярдәм бүлеге белгечләре зур ярдәм күрсәтте. Алар белән бергә без социаль адаптация программасын төзедек, анда миңа үтәргә кирәк булган чараларны этаплап яздык. Белгечләр документларны рәсмиләштерү, хисап бирү сроклары мәсьәләләре буенча консультацияләр бирделәр. Хәзер мин рәсми рәвештә эшли алам, үз осталыгымны камилләштерә, тотрыклы хезмәт хакы ала һәм иртәгәсе көнгә ышанычлы була алам», – диде Анастасия.