Зәй укучылары һөнәри юнәлеш бирүче экскурсиядә булдылар
29 нчы апрель көнне Зәйнең «Шатлык» халыкка социаль хезмәт күрсәтү комплекслы үзәгенең гаиләгә һәм балаларга социаль ярдәм бүлекчәсе белгечләре ведомствоара учетта торучы балалар өчен тематик экскурсия оештырдылар. Башта балалар халыкны эш белән тәэмин итү үзәгендә булдылар, белгеч вакансияләр базасында булган мәшгульлек хезмәте программалары һәм хезмәтләре белән таныштырды, шулай ук хезмәт базарындагы вәзгыять, эш эзләү ысуллары һәм җәйге каникуллар вакытында эшкә урнашу мөмкинлекләре турында сөйләде.
Аннан соң экскурсантлар почта бүлегендә булдылар. Почта хезмәткәре шәһәр халкына күрсәтелә торган хезмәтләр, учреждениеләр турында җентекләп сөйләде. Шулай ук үзәк яшүсмерләре кызыклы балалар газеталарына һәм журналларына ничек язылырга, хатлар, открыткалар, телеграммалар, посылкалар һәм бандерольләр җибәрергә, коммуналь хезмәтләр өчен түләргә мөмкин икәнлеген белделәр. Почта бүлеге хезмәткәрләре балаларга хатлар һәм посылкалар саклана торган махсус бүлмә күрсәттеләр, хатларның адресатка ничек барып җитүе турында сөйләделәр.
Очрашуда катнашучылар үзләрен кызыксындырган сорауларын бирделәр, эш эзләү белән бәйле проблемалар турында фикер алыштылар, шулай ук алынган мәгълүмат алар өчен актуаль һәм файдалы булуын билгеләп үттеләр.