«Үз-үзеңә бикләнмәскә»: Казанда тернәкләнүче МХО сугышчысы тарихы
Бүген ТР хезмәт, халыкны эш белән тәэмин итү һәм социаль яклау министры Эльмира Зарипова МХО катнашучыларына сәламәтлекләрен яхшыртырга һәм тулы канлы тормышка кайтырга ярдәм итүче «Восхождение» инвалидларны тернәкләндерү үзәгендә булды.
«Социаль тернәкләндерү җәмгыятьтә җайлашырга һәм сугышчыларга психологик ярдәм күрсәтүгә юнәлдерелгән», – дип сөйләде журналистларга матбугат туры барышында министр.
Аның сүзләренчә, моның өчен үзәктә иң заманча медицина җиһазлары кулланыла.
«ТР Рәисе ярдәме белән узган ел МХО катнашучыларын тернәкләндерү өчен билгеләнгән биш үзәкне без кирәкле өстәмә җиһазлар белән тәэмин иттек», – дип билгеләде Эльмира Зарипова.
Рөстәм Миңнеханов ярдәме белән 2025 елның июнендә «Восхождение» инвалидларны тернәкләндерү үзәге базасында 40 урынлык стационар бүлек оештырылды. Хезмәтләр елга ике мәртәбә күрсәтелә.
Социаль тернәкләндерү алгоритмы төп тернәкләндерү максатларын һәм бурычларын билгеләү өчен тирәнтен комплекслы диагностика үткәрүне үз эченә ала, бу сыйфатлы социаль хезмәтләр күрсәтергә мөмкинлек бирә, шул исәптән терәк-хәрәкәт аппараты, сулыш органнары, периферик нерв системасы җәрәхәтләре белән бәйле авырулар профильләре буенча.
Психологик проблемаларны төзәтү өчен төрле аппарат-программа комплекслары файдаланыла.
Ике Чечен кампаниясе ветераны һәм махсус хәрби операциядә катнашучы, «Шмель» позывное астында танылган Виталий Лебедев Казанның «Восхождение» үзәгендә комплекслы тернәкләндерү курсы уза. Элекке танк командиры һәм БПЛА операторы ике аягы да каты яраланганнан соң тернәкләнә.
Виталий өчен терелүгә юл Чебоксарда катлаулы операциядән соң башланган. Ветеран сүзләренчә, ул максатчан рәвештә буыннарны пассив эшкәртү өчен кирәкле «Артромот» махсус аппараты белән җиһазландырылган үзәкне эзләгән. Әмма «Восхождение» үзәгендә ул терапиягә караганда күбрәк алган.
«Мин конкрет бер аппарат өчен килдем, ә тулы бер комплекс алдым. Монда бик яхшы ДФК һәм актлар залында вак моторикага гадәти булмаган дәресләр уза. Башта мин аларга шикләнеп карадым, тик аннары моның ничек эшләвен аңладым: баш миенең ике ярымшары да кушыла, координация яхшыра. Нәтиҗәләр чыннан да яхшы», – дип хис-кичерешләре белән уртаклашты Виталий.
Яралану нәтиҗәләренә карамастан, Лебедев актив тормыш рәвеше алып бара. Ул өч бала тәрбияли, үз бизнесын үстерә һәм профессиональ рәвештә спорт белән шөгыльләнә.
Хәзер аның тормышында «Абилимпикс» инвалидлар өчен һөнәри осталык чемпионатына әзерлек аерым урын алып тора. Узган ел ул бөтен Россиядән илле катнашучы арасында «БПЛА операторы» компетенциясендә 10 нчы урынны алган. Быел үз нәтиҗәсен яхшыртырга планлаштыра.
Виталий ассызыклаганча, Татарстанда сугышчыларга ярдәм итүнең көчле системасы булдырылган, ул хезмәттәшләрен үз-үзләренә бикләнмәскә чакыра.
«Хәзер республика рәисе һәм Татарстан җитәкчелеге тарафыннан зур ярдәм күрсәтелә. Әгәр берәр нәрсә белән шөгыльләнергә теләк бар икән, мөмкинлекләр табыла. Иң мөһиме – ябылмаска. Үзеңне кешеләр янына, эшчәнлеккә чыгарырга кирәк», – ди ветеран.
«Восхождение» үзәге белгечләре билгеләп үткәнчә, пациентның мондый югары мотивациясе – тулы канлы тыныч тормышка уңышлы кайту нигезе.
МХОда катнашучыларны социаль тернәкләндерү өчен республиканың социаль яклау системасында биш тернәкләндерү үзәге эшли, аларда чиратсыз рәвештә индивидуаль тернәкләндерү программаларында тәкъдим ителгән социаль тернәкләндерү хезмәтләре түләүсез күрсәтелә.
Фото авторы: Михаил Захаров, «Татар-информ» МА