Ярдәм кулын сузу
Буаның «Гармония» халыкка социаль хезмәт күрсәтү комплекслы үзәге эшчәнлегенең бер юнәлеше булып авыр тормыш хәлендә булган гражданнарга, аз тәэмин ителгән, күп балалы гаиләләргә, ялгыз һәм ялгыз яшәүче пенсионерларга һәм инвалидларга хәйрия ярдәме күрсәтү тора.
Шушы көннәрдә үзәккә социаль яктан начар шартларда калган ир-ат мөрәҗәгать иткән. Өйдә социаль хезмәт күрсәтү бүлекчәсе социаль эш буенча белгече Инга Шәрипова гражданнарга адреслы ярдәм күрсәтү өчен спонсор җәлеп итү буенча эш оештырды.
Ярдәмгә Буа районының хәйрия склады җитәкчесе Ольга Шевелева килде, ул мохтаҗларга беренче кирәк-яраклар һәм азык-төлек җыелмасы тутырылган пакет тапшырды. Ир-ат чын күңелдән битараф булмаган кешегә юмартлык һәм күңел җылысы өчен рәхмәт белдерде.
Шунысын да билгеләп үтәргә кирәк, Ольга Шевелева ярдәмгә мохтаҗ кешеләргә, аз тәэмин ителгән гаиләләргә һәм авыр тормыш хәленә юлыккан гражданнарга инде берничә тапкыр булыша.