«Ышаныч» үзәгендә социаль хезмәт алучыларга азык-төлек китерүнең яңа формасын кертү турында фикер алыштылар
13 декабрь көнне Яр Чаллы шәһәренең «Ышаныч» халыкка социаль хезмәт күрсәтү комплекслы үзәгендә «Пятерочка Доставка» мобиль сервисы аша социаль хезмәт алучыларга азык-төлек һәм беренче чиратта кирәкле товарларны сатып алу һәм китерү хезмәтен гамәлгә кертү уңаеннан киңәйтелгән киңәшмә узды.
Киңәшмәне шәһәр социаль яклау идарәсе башлыгы И. В. Скрябина ачты. Ул билгеләп үткәнчә, яңа функционал гражданнарның бу категориясенә өйләреннән чыкмыйча гына кирәк әйберләр сатып алу мөмкинлеге бирәчәк.
«Ышаныч» үзәге директоры урынбасары Л. Ш. Вәлиева социаль хезмәткәрләргә һәм социаль хезмәтләр алучыларга мөһим аспектлар турында сөйләде. Алар өчен күп кенә өстенлекләр булачак.
Социаль хезмәткәрләргә мобиль сервисны куллану тәртибенә өйрәтү буенча видеоматериал күрсәтелде. Китерелә торган продукциянең сыйфаты, товарны китерү вакытына аерым игътибар бирелде. Биредә сәүдә челтәре үз гарантиясен бирә.
Эшлекле очрашу барышында социаль хезмәткәрләрдә бик күп сораулар туды, аларга тулы җаваплар бирелде.