«Салават күпере» үзәге карамагындагылар әниләр өчен җиләк-җимеш бәйләмнәре ясадылар

Бөгелмәнең «Салават күпере» халыкка социаль хезмәт күрсәтү комплекслы үзәге каршындагы «Бакчачылык» хезмәт тернәкләндерү кабинетында балигъ булмаган балалар белән иҗади дәрес уздырдылар.

«А хәрефеннән Я хәрефенә кадәр үсемлекләр» түгәрәгендә катнашучылар үз әниләрен чәчәк түгел, ә җиләк-җимеш бәйләмнәре белән сөендерергә булдылар. Түгәрәк җитәкчесе Светлана Кирдина балаларга җиләк-җимешләрнең составы һәм файдасы турында сөйләде, һәм балалар әниләрен файдалы бүләк белән шаккатырырга булдылар. Социаль хезмәт алучылар үзенчәлекле бәйләмнәрне якыннарына зур горурлык белән тапшырдылар.