«Веста» үзәге территориясендә инвалид балалар өчен уңайлы мохит белән күп функцияле мәйданчык ачылды
25 августта Түбән Кама «Веста» гаиләгә һәм балаларга социаль ярдәм үзәге территориясендә инвалид балалар һәм сәламәтлекләре буенча мөмкинлекләре чикләнгән балалар өчен уңайлы мохит белән заманча күп функцияле балалар спорт-уен мәйданчыгы ачылды. Мәйданчык өчен җиһазлар «Sunny town»-«Кояшлы шәһәрчек» проектын тормышка ашыру өчен 2019 елда «Инвалид балаларның ата-аналары һәм опекуннары ассоциациясе» Түбән Кама район һәм шәһәр иҗтимагый оешмасы тарафыннан алынган «Татнефть» ГАҖ Хәйрия фондының гранты хисабына сатып алынды һәм урнаштырылды. «Веста» үзәге – проектны тормышка ашыру буенча партнер.
«Веста» үзәгендә инвалид балалар һәм мөмкинлекләре чикләнгән балалар социаль хезмәт күрсәтүдә тора. Үзәкнең спорт залында алар белән «Сәламәтлек баскычы» циклыннан физик культура буенча дәресләр үткәрелә, ә балаларның ата-аналары индивидуаль психологик консультацияләр ала.
Физик активлык – сәламәтлекләре буенча мөмкинлекләре чикләнгән балаларны тернәкләндерү һәм социальләштерү өчен мөһим шарт. Балалар өчен уңайлы мохит булган спорт-уен мәйданчыгы физик культура һәм саф һавада массакүләм спорт-уен бәйрәмнәре оештырырга һәм үткәрергә, балаларның физик һәм психик сәламәтлеген сакларга һәм ныгытырга, җәмгыятьтә тулы канлы тормыш алып барырга мөмкинлек бирәчәк.
