Татарстанда «Ярдәм янәшә!» акциясе кысасында чираттагы азык-төлек җыелмалары партиясен таратуга керештеләр
Бу көннәрдә республиканың муниципаль районнары һәм шәһәрләре «Ярдәм янәшә! Помощь рядом!» хәйрия акциясенең чираттагы траншларын кабул итәләр. Азык-төлек җыелмалары белән фураларны бушатуда волонтерлар, авыл җирлекләре башлыклары, район хакимияте вәкилләре катнаша.
Исегезгә төшерәбез, республика хәйрия акциясе Татарстанда президент Р.Н. Миңнеханов инициативасы буенча башланды. Азык-төлек җыелмаларын алучылар исемлеге Татарстан Республикасы Хезмәт, халкыны эш белән тәэмин итү һәм социаль яклау министрлыгы тарафыннан билгеләнгән.
Мәсәлән, Сарман районында «Ярдәм янәшә! Помощь рядом!» акциясе кысасында азык-төлек җыелмаларын 505 кеше алачак, Чүпрәле муниципаль районында хәйрия ярдәме тартмалары 417 адресатка җиткерелгән инде.
Кама Тамагы районына азык-төлек җыелмаларының чираттагы партиясе кичә килде. Фураны бушатуда муниципаль район башлыгы Наил Вазыйхов шәхсән үзе катнашты.
