Александр Овечкин белән зарядка һәм мастер-класслар: «Теплый дом» приютында бәйрәм узды
Кичә билгеләп үтелгән Халыкара балаларны яклау көне Чүпрәленең «Теплый дом» балалар һәм яшүсмерләр өчен социаль приютында чараларга бай иде. Балалар бик теләп конкурсларда, күңел ачу чараларында, мастер-классларда һәм викториналарда катнаштылар.
Иртә танылган хоккейчы Александр Овечкин белән зарядка белән башланып китте: балалар спортчы күрсәткән күнегүләр комплексын бик теләп башкардылар. Аннары дистанцион мастер-класслар башланды. Приютта тәрбияләнүчеләр музыка, бию, рәсем һәм оригами буенча онлайн-дәресләрдә катнаштылар.
Көннең икенче яртысында бәйрәм чаралары актлар залында дәвам итте, анда әдәби-музыкаль чара узды. Табышмаклар, конкурслар һәм бию биремнәре балаларга гына түгел, барлык өлкәннәргә дә бик ошады.
Кич белән тәрбияләнүчеләр онлайн-викторинада катнаштылар, барлык катнашучылар да сертификатлар алдылар. Бәйрәм көне дискотека белән тәмамланды.