«Ярдәм янәшә!» акциясе кысаларында Балтач районында яшәүче 479 кеше азык-төлек җыелмалары алачак

2020 елның 6 мае, чәршәмбе

Кичә Балтач муниципаль районына «Ярдәм янәшә! Помощь рядом!» хәйрия акциясе фургоны килде. Азык-төлек җыелмаларын бушатырга волонтерлар һәм авыл җирлекләре башлыклары булышты.

Акция кысаларында Балтач муниципаль районында яшәүче 479 кеше азык-төлек җыелмалары алачак.

Акциядә Балтач районы башлыгы Рамил Нотфуллин да катнашты. Ул Нурма авылыннан Хәйруллиннар һәм Галиевлар гаиләсенә азык-төлек тартмалары тапшырды. Шулай ук район башлыгы Галия Садиковага азык-төлек җыелмасы да алып килде.

Беренче азык-төлек җыелмаларын район авылларында да тапшырдылар инде.

Исегезгә төшерәбез, «Ярдәм янәшә! Помощь рядом!» хәйрия акциясе Татарстанда ТР Президенты Рөстәм Миңнеханов инициативасы белән башланып китте.