Түбән Камада инвалид балаларны өстәл теннисына өйрәтү буенча проект тормышка ашырылачак
Түбән Каманың «Веста» гаиләгә һәм балаларга социаль ярдәм үзәге «Түбән Кама һәм Түбән Кама муниципаль районы хатын-кызлары» иҗтимагый оешмасы белән күптән хезмәттәшлек итә. 2020 елда Россия Федерациясе Президентының гражданлык җәмгыятен үстерүгә грантлар бирү бәйгесендә оешма 239 835 сумлык грант отты.
«Төрле балалар – тигез мөмкинлекләр» проекты күрү буенча инвалид балалар һәм аларның сәламәт яшьтәшләре өчен өстәл теннисы буенча инклюзив дәресләр үткәрү өчен шартлар булдыруны күздә тота.
Инвалид балалар белән эшләү тәҗрибәсе зур булган «Веста» үзәге әлеге проектны тормышка ашыру буенча партнер булды һәм дәресләр үткәрү өчен мәйданчык бирәчәк. Үзәк психологы проектта катнашучы 50 кеше белән психологик дәресләр үткәрәчәк, ә белгечләр кирәк булган саен консультатив һәм методик ярдәм күрсәтәчәкләр. Өстәл теннисы буенча укытучы «Showdown» буенча укыту дәресләре курсы һәм проектта катнашучылар арасында турнир үткәрәчәк.
«Төрле балалар – тигез мөмкинлекләр» проекты агымдагы елның апрелендә старт алачак һәм 7 ай дәвамында тормышка ашырылачак.
Проектка нәтиҗәләр агымдагы елның октябрь ахырында өстәл теннисы буенча «Showdown» йомгаклау чарасында ясалачак.
Проектны тормышка ашыру тәмамланганнан соң, балалар киләчәктә дә үзләренең сәламәт яшьтәшләре белән бергә яраткан спорт төре белән шөгыльләнә алачаклар. «Веста» үзәге базасында өстәл теннисы буенча «Showdown» дигән спорт түгәрәге эшләячәк.