Татарстан Республикасы хезмәт хакы дәрәҗәсе буенча Идел буе федераль округында икенче урында
Татарстан Идел буе федераль округы төбәкләре арасында хезмәт хакы күләме буенча алдынгы позициядә тора.2019 елның гыйнвар-октябрь айларында уртача хезмәт хакы, 2018 елның шул ук чоры белән чагыштырганда, 5,9 % ка артты һәм 36 357 сум тәшкил итте.
Уртача айлык хезмәт хакы дәрәҗәсе буенча лидерлар рәтендә; файдалы казылмалар чыгару – 58 352,4 сум, финанс-иминият – 50 588,9 сум, шулай ук фәнни һәм техник эшчәнлек – 49 839,4 сум.
Шуны да билгеләп үтәргә кирәк, 2020 елның 1 гыйнварыннан Россиядә минималь хезмәт хакы күләме 12 130 сум тәшкил итә. Татарстанда бюджеттан тыш сектордагы оешмалар өчен минималь хезмәт хакы күләме 14 мең сум күләмендә билгеләнде.
Татарстан Республикасында 2020 елның 1 гыйнварына хезмәт хакы буенча бурыч 65 867 мең сум тәшкил итә. Тармак буенча иң зур бурыч эшкәртүче производстволарга караган предприятиеләрдә - 57 542 мең сум (77,7 %).
Бүген Татарстан Республикасы Хезмәт, халыкны эш белән тәэмин итү һәм социаль яклау министрлыгының йомгаклау коллегиясе утырышында ведомство башлыгы Эльмира Зарипова билгеләп үткәнчә, 2019 елда территориаль комиссияләр тарафыннан 7 527 предприятие тикшерелгән, хезмәт хакын минимальдан түбәнрәк түләүче 3 407 предприятие (45,26%) ачыкланган. 9 033 хезмәткәргә 3 509,5 мең сум акча кайтарылган.
Прокуратура белән берлектә 596 эш бирүче тикшерелде, 394 хезмәт хакын вакытында түләмәү очрагы ачыкланды. Кабул ителгән чаралар нәтиҗәсендә 283,2 млн. сумлык тоткарланган хезмәт хакы түләнгән.