Социаль хезмәт алучы яшьләр кышлаучы кошларны өйрәнә
Яр Чаллы шәһәре “Ышаныч” халыкка социаль хезмәт күрсәтү комплекслы үзәгенең гаилә һәм балаларга социаль ярдәм күрсәтү бүлегендә социаль хезмәт алучы балалар 4 нче экология-биология үзәгенең даими кунаклары.
Күптән түгел алар “Кошлар ашханәсе” шәһәр акциясе уңаеннан "Безнең як кошлары” дип исемләнгән кызыклы һәм мавыктыргыч чарада катнаштылар.
Чара барышында балалар һәм аларның әти-әниләре кошлар турында викторина сорауларына җавап бирде, “орнитолог” һөнәре белән танышты, канатлы дуслар өчен төрле җимлекләр күрделәр, тере почмакта яшәүчеләр белән аралаштылар. Моннан тыш, мастер-класста балалар үз куллары белән балчыктан кош формасындагы сыбызгылар ясадылар.
Чара кызыклы һәм файдалы узды. Балалар өйдә җимлекләр ясарга һәм кышлаучы кошларны ашатып торарга сүз бирделәр.