Чаллыда инвалидларны эшкә урнаштыру җәһәтеннән чаралар оештырыла
Яр Чаллы шәһәре мәшгульлек үзәге 15 августтан алып 29 август аралыгында “Тигез мөмкинлекләр дөньясы” дип аталган, физик мөмкинлекләре чикле гражданнар өчен төрле чаралар үткәрә.
Яр Чаллы шәһәре мәшгульлек үзәгенең һөнәри ориентация һәм һөнәри укыту бүлеге белгечләре тарафыннан “Минем – бүгенге көнем, минем – киләчәгем” дигән тренинг оештырылды. Ул һөнәри үзбилгеләнүне ачыклауга корылган иде.Тренингта физик мөмкинлекләре чикле 12 эшсез гражданин катнашты.
Тренинг заманча хезмәт базары шартларында актив тормыш позициясе булдыруга һәм психологик халәтне камилләштерүгә юнәтелгән. Катнашучылар эшкә урнашуда киртә булган мәсьәләләргә тукталдылар, аларны чишүдә нинди уңай юллар табып булуын бергә хәл иттеләр.
Бу чараның мөһим мәсьәләсе булып эшкә урнашуга омтылышны арттыру, физик мөмкинлекләре чикле эшсез гражданнарның шәхси ресурсларын активлаштыру, шулай ук катнашучыларда тормышка уңай караш уяту тора иде.
Тренингка йомгак ясап, шуны әйтәсе килә, һәр катнашучы үзенең һөнәри мәнфагатьләрен билгеләде, катлаулы тормыш мәсьәләләрен чишү юлларын тапты, шулай ук кешеләр белән аралашканда бик зур уңай тәэсирләр алды, кызыксынулары уртак булган кешеләр белән очрашты.