Мамадыш районында Бөек Ватан сугышы ветераннары белән очрашу оештырылды

Шушы көннәрдә Мамадышның “Забота” халыкка социаль хезмәт күрсәтү үзәгенең социаль-тернәкләндерү бүлегендә реабилитация үтүче Бөек Ватан Сугышы ветераннары белән чираттагы мәгълүмати-консультацияле очрашу узды.
    Очрашуда район башлыгы Анатолий Иванов, район үзәк хастаханәсенең баш табибы Дамир Хәзиев, пенсия фонды башлыгы Шамил Хәсәнов, “Забота” халыкка социаль хезмәт күрсәтү үзәге директоры Людмила Телешева, компания идарәчесе Нияз Мухаметханов, ветераннар берлеге рәисе Гөлнәзирә Талипова катнаштылар.
    Район башлыгы чыгышын ветеранарны Җиңүнең 70 еллык бәйрәме белән котлап, аларга корычтай нык саләмәтлек, бәхет һәм озын гомер теләп башлап җибәрде. Аннан сүз соңгы ун елда эшләнгән эшләр турында барды һәм бу елга булган планнар белән таныштырылды. Җанлы сөйләм барышында ветераннар үзләрен кызыксындырган сорауларга җаваплар алдылар. Сөйләшү җитәкчеләргә дә, ветераннарга да бик файдалы булды.