Татарстанда Ярославльдә узачак социаль хезмәткәрләр форумына әзерләнәләр

26-27 мартта Ярославль шәһәрендә Бөтенроссия социаль хезмәткәрләр форумы узачак. Биредә РФ премьер-министры Дмитрий Медведев катнашачак.
Форумга социаль хезмәткәрләр, министрлыклар, иҗтимагый оешмалар вәкилләре чакырылган. Беренче көнне кадрлар белән тәэмин итү, һөнәри стандартлар, уңайлы мохитне үстерү, Бөек Ватан сугышы ветераннарына ярдәм итү, гаилә мәнфәгатьләрен яклау, Россия Почтасы эшен оештыру, авыл кешеләренең компьютер белемен камилләштерү кебек темалар буенча секцияләр эшләячәк.
Төп темаларның берсе өлкәннәр һәм инвалидларга социаль ярдәм күрсәтү булачак. Биредә яңгыраган тәкъдимнәр өлкәннәр мәнфәгатьләрендә эшләр стратегиясенә керәчәк.
Татарстан делегациясенә ТР Дәүләт советы рәисе урынбасары Римма Ратникова, ТР Хезмәт, халыкны эш белән тәэмин итү һәм социаль яклау министры урынбасары Юлия Абдреева, Буа районы пенсия фонды идарәсе башлыгы Рәфыйк Җәләлов, Балтач социаль яклау бүлеге башлыгы Алсу Гатиятуллина, шулай ук "Бердәм Россия" партиясе башкарма комитеты җитәкчесе Андрей Кондратьев керәчәк.
Оештыручылар бу форум гамәлдәге законнарның нәтиҗәлелеген бәяләргә, аны камилләштерү буенча тәкъдимнәрне берләштерергә һәм иҗтимагый-эксперт берләшмәсе булыдырырга мөмкинлек бирер дип өметләнәләр.