Татарстаннан бер төркем бала Кырымга ял итәргә китте

19 нчы июльдә Татарстаннан бер төркем бала Кырымга ял итәргә җибәрелде. Балалар Севастопольнең Орловка бистәсендә нәкъ диңгез янында урнашкан "Атлантус" сәламәтләндерү лагерендә ял итәчәкләр. 21 көн дәвам итәчәк беренче сменада ял итәргә 184 бала китте, шуларның 62се социаль приютларда тәрбияләнүче балалар, 45 - Казан Суворов училещесында укучылар, 77 се - аз тәэмин ителгән гаиләләрдә тәрбияләнүчеләр.
Юлламалар өчен һәм юлга акча федераль бюджеттан бүленгән - 13,5 миллион сум, ә балаларны ял итү урынына озатып баручыларның  юлы республика бюджетыннан түләнгән.
"Атлантус" лагере бик матур җирдә урнашкан, - ди Татарстан Республикасы Хезмәт, халыкны эш белән тәэмин итү һәм социаль яклау министрлыгының техник тернәкләндерү чаралары һәм санатор-курорт дәвалавы белән тәэмин итү бүлеге баш киңәшчесе Ольга Замалдинова. - Бар җирдә бик матур, чиста, роза чәчәкләренә күмелгән. Без ял итәргә алып килгән балалар аерым бәдрәф һәм душ булган дүрт  урынлы бүлмәләргә  урнаштылар. Биш тапкыр ашату каралган. Су белән тәэмин ителү белән дә проблемалар юк. Кайнар су тәүлек буе килә: биредә кояш батареялары урнаштырылган. Пляжда балалар көнгә ике тапкыр булачаклар.
17 нче июльдән башлап "Атлантус" лагеренә Омск, Мурманск, Тула, Чувашиядән балалар килгән, әмма лагерьнең беренче  сменасын тантаналы рәвештә ачып җибәрү өчен барысы да татарстанлыларны көткәннәр.
9 нчы августтан башланачак икенче сменага Кырымга Татарстанның аз тәэмин ителгән гаиләләреннән тагын 184 бала җибәреләчәк.