Азнакай халыкны эш белән тәэмин итү үзәге белгечләре һөнәри юнәлеш бирүче чара уздырганнар

Шушы көннәрдә Актүбә шәһәр тибындагы бистәсендә Азнакай халыкны эш белән тәэмин итү үзәге белгечләре тарафыннан "Без сайлаган юллар" дип исемләнгән һөнәри юнәлеш бирүче фестиваль  үткәрелгән. Биредә Актүбә һәм районның башка мәктәпләрендә белем алучы өлкән сыйныф укучылары катнашкан.
Әлеге чарада Әлмәт мәгълүмати технологияләр һәм сервис техникумы, "ТИСБИ" университетының Әлмәт филиалы, Лениногорск политехник көллиятенең Азнакай филиалы, Туполев исемендәге Милли тикшеренү Техник Университетының Әлмәт филиалы һ.б. уку йортлары вәкилләре катнашкан. Алар укучыларны белгечлекләр, уку юнәлешләре белән таныштырганнар. Мәгълүмати буклетлар, листовкалар таратканнар. Халыкны эш белән тәэмин итү үзәге белгечләре исә укучыларга шәһәр һәм районда булган эш урыннары турында сөйләгәннәр, вакытлыча эшкә урнашу буенча сорауларга җавап биргәннәр.