Норлатның "Гармония" үзәгендә хәтер альбомы ясыйлар

Норлатның "Гармония" халыкны социаль тәэмин итү үзәгендә "Хәтерләячәкбез" дигән программа эшли башлаган.  Аның кысаларында социаль хезмәткәрләр өйгә килеп социаль тәэмин итү бүлекчәсе карамагындагы ветераннар, тыл хезмәтчәннәре, тол ветеран хатыннарының хезмәт һәм сугыш чорындагы  каһарманлыклары турында мәгълүмат җыялар. Җыелган мәгълүмат "Хәтер альбомына" матурлап тупланып бара. Альбомның редакторлары һәм рәссамнары - "Гармония" клубы әгъзалары -  патронатта торучы гаиләләрдә тәрбияләнүче балалар.
Эш әлегә башланган гына, әмма балаларга бик күп әйбер кызыклы тоелган инде. Шуңа күрә аларны ветераннар белән очраштыру турында карар кабул ителгән. Белгечләр фикеренчә, мондый очрашулар балалар арасында патриотлык хисләрен торгызу һәм ныгытуга яхшы тәэсир итәчәк.  Аларда бабалары өчен горурлык хисе уяна, алар туган илне саклау төшенчәсенең асылын аңлый башлый, ди белгечләр.