Нурлатның "Гармония" үзәге карамагындагы гражданнарны кинотерапия ысулы белән дә тернәкләндерәләр

Нурлатның "Гармония" халыкны социаль тәэмин итү комплекслы үзәгендә Космонавтика көненә багышланган чара узган. Биредә патронаттагы гаиләләрдә тәрбияләнүче балалар өчен "Нәниләр өчен астрономия" дип исемләнгән  мультипликацион фильм карау оештырылган.  Мәктәп укучыларының ялын оештырудан тыш,  гаиләгә һәм балаларга социаль ярдәм бүлекчәсе белгечләре аларның белем дәрәҗәсен күтәрү, астрономия фәненә карата кызыксыну уяту,  илебезнең космос өлкәсендәге уңышлары өчен горурлык, патриотлык хисе тәрбияләү кебек мәсьәләләр өстендә дә эшлиләр.
Фильмны караганнан соң психолог Надежда Таймуллина балалар белән уртак дискуссия оештырган.  Бу этапта балалар дөрес сөйләргә һәм мәгълүматны тыңлаучыларга дөрес җиткерергә өйрәнгәннәр.
Белгечләр билгеләгәнчә, мондый кинотренинглар "Гармония" үзәгендә аена ике тапкыр үткәрелә.  Әлеге эш юнәлешен биредә социаль эш буенча белгеч Инга Садовникова җитәкли. Аның тарафыннан "Арле-кино"  дигән  клуб оештырылган. Бирегә балалар гына түгел, өйгә килеп социаль хезмәт күрсәтү бүлекчәсе карамагындагы гражданнар да даими йөри. Һәр ике төркем өчен дә яшьләренә туры килә торган, танып белүгә юнәлдерелгән фильмнар күрсәтелә.